Mattanja – ‘n nuwe tuiste vir ons bejaardes

Aleyda Brandt gooi die voordeur wawyd oop toe Gansbaai Courant by Mattanja, die nuwe versorgingsfasiliteit in die dorp gaan inloer het.

Die gesellige woonhuis is geleë in De Wetstraat en bied ‘n huislike atmosfeer met ruim, sonnige kamers vir mense wat daagliks bystand nodig het.

Aleyda, die bestuurder en ook ‘n geregistreerde verpleegkundige staan vanaf 1 Augustus aan die stuur van sake by die versorgingstuiste.

Sy vertel dat daar ook aan mense met fisiese of psigiese probleme verblyf verskaf word. Die omgewing is rustig en terapeuties, maar ook goed toegerus met sit- en kuierplek buite die slaapkamers. Die binnehof bied ‘n kuierplek in die vrolike tuin, maar verseker ook inwoners se veiligheid.

Mattanja bied 24 uur verpleegsorg deur opgeleide, toegewyde verpleegsters wat nie alleen gemoedsrus aan inwoners bied nie, maar ook aan familielede wat nie elke dag daar kan wees vir hulle geliefdes nie.

‘n Geregistreerde verpleegkundige sal daagliks aan diens wees en die fasiliteit bied ook 24 uur verpleegbystand indien dit nodig sou wees.

Inwoners kan verseker wees van drie smaaklike maaltye elke dag. Hulle wasgoed word ook op die perseel versorg.

Aleyda nooi belangstellendes om Mattanja te besigtig en hulself te vergewis van die huislikheid, gepaardgaande met uiters billike tariewe.